Pharoah Sanders "Live in Paris 1975"

Día Internacional do Jazz, así que imos con algo do xénero.

A recomendación de hoxe é dun dos grandes do jazz espiritual. Pharoah Sanders. A historia de Sanders é unha desas de loita contra os elementos, ata convertirse nun dos máis grandes, evolucionando dende o bebop cara o free jazz e o modal, e incorporando a rítmica africana nas súas composicións. Sen dúbida considerado un dos saxofonistas máis grandes da historia.

Nos seus primeiros anos chegou a grabar con Sun Ra, pero a comezos dos 60s pasou á primeira liña da man de John Coltrane, e trala súa morte continuou como pilar fundamental da banda de Alice Coltrane.

Dende ahí evolucionou ao jazz espiritual, plasmado en álbumes coma "Tauhid" ou "Karma" lanzados con Impulse! en 1967 e 69 respectivamente. Precisamente 'The Creator Has A Master Plan', a base do álbum "Karma", é unha das pezas centrais deste "Live in Paris 1975" que hoxe vos recomendamos, pero sen a parte vogal.

O álbum foi gravado polo Pharoah Sanders Quartet o 17 de novembro de 1975 no Grand Aditorium de Paris, sede do Studio 104 da Maison da Radio pública. A formación estaba composta por Sanders ao saxo, Danny Mixon piano e órgano, no contrabaixista Calvin Hill, e o baterista Greg Bandy. 

O repertorio daquela note repasaba algunhas das coposicións máis exitosas dos seus primeiros álbumes coma frontman: dúas partes de 'Love is Here', 'Farrell Tune', 'The Creator...', a suave 'IWant to talk about you', e o apoteósico final de 'Love is Everywhere' incorporando as voces cerimoniais, e rematando cun fantástico solo de Sanders.

Un concerto icónico, moitas veces mencionado, pero que nunca ata o de agora vira a luz coa suficiente calidade. Dende marzo xa o tedes dispoñible no selo Transversales Disques.

PHAROAH SANDERS "Live in Paris 1975 (Lost ORTF Recordings)"

(Transversales Disques, 2020)

Wild Honey Records "The Benefit of things to come"

Outra compilación con fins solidarios.

Neste caso chega do selo italiano Wild Honey Records: "The Benefit of Things to Come", e os seus ingresos destinaránse ao hospital de Bergamo.

Unha colección de bandas con Peawees ou The Midnight Kings, xunto con clasicazos coma Radio Birdman ou The Rubinoos. E a portada, recreando a mítica cuberta dos Refused.

>> Bandcamp de Wild Honey Records.

The Groupies "Primitive"

Comezamos semana con lanzamentos.

Isto non é nada novo, pero case coma se o fora.

The Groupies foi unha banda seminal de garage 60s de New York, habitual nas mellores coleccións do xénero, pero tan efímeros que apenas tiveron pegada nin tempo para demostra-lo seu potencial. Dende os 80s convertíronse en banda de culto da man dos Cramps, que incluíron o seu mitico 'Primitive' no "Psychedelic Jungle" de 1981, e así chegou ata a nosa xeración.

Na súa formación básica eran Norman 'Cooker' Desrosiers, vocalista e armónica, Pete Hendleman na guitarra, Gordon McLaren ao baixo e Bobby Cortez na batería. O seu son foi moi característico, semellante aos primeiros Electric Prunes ou The Seeds.

The Groupies foron tan efémeros que só publicaron un single, "Primitive / Hog (I'm A Hog For You Baby)" con ATCO en 1966, con bastante éxito, triunfando nos clubes de NYC e probando fortuna en Los Angeles, pero a súa historia rematou ahí.

As súas gravacións foron escasas, pero deixaron máis do que puideron amosar ao mundo. No 2005, Sundazed recuperou dous temas máis das súas gravacións "Down In The Bottom / You Changed Again", coa versión de Willie Dixon, publicado nun 7''. 

Agora o selo BeatRocket (filial de Sundazed) recupera tódalas súas gravacións neste "Primitive". Por suposto os catro temas xa publicados, e unha boa colección de blues alucinado e garage psicodélico. Máis aló das coñecidas, recomendámosvos 'You'll be mine' ou a divertida 'You Can't Judge a Book By the Cover'. Inclúen entre os 13 cortes, o audio da presentación dun concerto que lles fixo Kim Fowley previo a 'Little Baby', e entre máis versións tamén atoparedes 'Gloria' dos Them.

Unha auténtica marabilla que recuperen esto.

THE GROUPIES "Primitive"

(BeatRocket, 2020)

"QUARANTUNES: Songs From Self​-​Isolation" de Burger Records

Máis compilacións para estes tempos estraños.

Desta vez dun dos nosos selos de referencia. Dende Burger Records veñen de lanzar unha colección de 8 volumes co título de QUARANTUNES: Songs From Self​-​Isolation, e inclúe máis de 150 bandas e 8 horas de música dos artistas da compañía. 

Moitos temas foron gravados durante estas semanas de confinamento, e outros foron selecionados polas súas letras sobre o illamento, o fogar, etc... pero nada de baixón, isto ven de Burger Records. De mostra a enérxica 'I Wanna Stay Home With U' dos Table Scraps, pero tamén atoparedes a The Zeros, os Streetwalkin' Cheetahs, Die Group, The Sufis, ExBats ou The Fadeaways.

Inicialmente lanzáronse 7 volumes con 20 temas cada un, ao que logo se engadíu un volume máis de apéndice con outros 19 cortes. Os ingresos irán destinamos ás propias bandas durante este tempo de parón da actividade.

>>> Todo dispoñible no bandcamp de Burger Records.

Fugazi "Repeater"

Esta semana cumpríronse 30 anos do lanzamento do "Repeater" de Fugazi. 

Xa sabedes que este é un dos álbumes da miña vida, se non o que máis... 

Como xa temos escrito demasiado sobre el, hoxe só podemos decirvos que o escoitaremos unhas cantas veces máis.

Un imprescincible.

 

Día do Libro

Feliz día do Libro!! 

Calquera outro ano estaríamos decíndovos que saírades a mercar e agasallar libros. Este ano é distinto aínda que algo se pode facer, pero esperamos que aproveitedes o confinamento para devorar ducias de libros. 

foto: Meetmindful.

Malaraio "Demo"

A comezos de semana, os composteláns Malraio compartiron o seu novo.

Leva por título "Demo", e foi gravado nos estudios Potemkin de Santiago por Jacobo Iglesias e Dani Blanco, coa produción de Fon Botana, e as mesturas pasando por diferentes mans. Xa avisaran que todo o proceso presentara moitos maís problemas dos previstos, asi que alegrámonos de poder escoitalo rematado ao fin.

Son 8 temas que continúan a vía do seu anterior EP "Prótese", post-hardcore e melodías pop (pop pantanoso, din eles), e cunha instrumentación que gaña intensidade coa minutaxe de cada tema. As letras, por suposto, para escoitar varias veces e pensar un rato. 

Por escoller dous temas, diríamosvos 'Ninja' e 'Obsolescencia', pero temos moito tempo por diante para darlle máis voltas. 

Esperamos volver a velos en directo tan pronto coma sexa posible.

>> "Demo" no bandcamp de Malraio.

MALRAIO "Demo"

(Autoeditado, 2020)

A estrea dos Dead Wood [Revival]

Imos facer un pouco de revival.

Poñemos o retrovisor cinco anos atrás, para recuperar o show de estrea dos Dead Wood. Foi o 11 de abril do 2015. Un orgullo de que escolleran ó Rif-Rock para a súa posta de largo.

Aquela primeira formación en directo era un trío formado polo Sheriff Lorre e Rufus el Guarro (a.k.a. Mr Bam Bam daquela), e Breo Gun, que un par de anos máis tarde deixou o proxecto por motivos profesionais.

Podedes recuparar o resumo daquela noite aquí, e todo o material dos Dead Wood nesta etiqueta.

Volveron periódicamente ao local, e pouco a pouco foron ampliando a formación, creceron no o seu repertorio, e lanzaron o seu debut en vinilo con Ulomanía Coop.("Spirit Away b/s CBA Blues"). E a día de hoxe ahí siguen coma unha das formacións máis orixinais da comarca. Nunca lles perdades a pista!

Aquí tedes o concerto completo daquela noite:

Matado por la Muerte Vol.3

Máis recopilatorios, pero este xa non é novo.

Hoxe recomendámosvos o terceiro volume do mellor recopilatorio actual de punk e hardcore en castelán. Trátase de Matado por la Muerte, cada volume faise esperar, pero cada vez que saen son un pepinazo. Os anteriores sairon no 2008 e 2014, e en outubro do 2019 lanzaron esta terceira entrega, con 21 temas de 18 bandas punk.

A edición física correu a cargo de Beat Generation, Discos Banana, Jgc Producciones e Un minuto de gloria.

>>> bandcamp de MPLM.

VA "Matado por la Muerte Vol.3"

(Beat Generation / Discos Banana / Jgc Producciones / Un minuto de gloria, 2020)

"33 Folc Songs the Beat a Pandemic" de Folc Records

Máis iniciativas para recadar fondos que destinar ao sector sanitario. 

Dende Folc Records fixeron esta enorme compilación de temas do seu extenso catálogo, recuperando temas de vellas edicións e tamén con temas inéditos. Atoporedes bandas de cabeceira, dende os Mudhoney, Coyote Men, Powersolo, Hipbone Slim, MFC Chicken ou King Salami, clásicos estatais coma Deltonos ou Señor No, e tamén bandas galegas do selo coma Familia Caamagno, Thee Blind Crows ou Terbutalina. Kick Out the Virus!!

Todo por só 7€, e con sorteos de discos entre os participantes.

>> Dipoñible no bandcamp de Folc Records.

VA "33 Folc Songs to Beat a Pandemiac"

(Folc Records, 2020)

Futuro Terror `Territorio Devastado / Mañana'

Os alicantinos Futuro Terror están a preparar o seu retrono.
Esta mañan compartiron dous novos temas do seu próximo álbum, "Sangre", que saldrá con Humo, cando sexa posible, como tantos outros.
Aquí tedes 'Territorio Devastado' e 'Mañana' para ir facéndonos as ganas...

The Dream Syndicate "The Universe Inside"

O venres pasado lanzouse o novo traballo dos Dream Syndicate, que despois dos adiantos que levaban lanzados xa apuntaba a que iamos a tolear con el.

"The Universe Inside" é unha volta de torca máis á nova liña da banda dende a súa reunión no 2013, na que se manteñen Steve Wynn e o baterista Dennis Duck dende a súa fundación e o baixista habitual Mark Walton dende a época anterior. Ademáis contan nestes últimos tempos coas guitarras de Jason Victor  e coa incorporación de Chris Cacavas nos teclados para este álbum. Ademáis suman nesta ocasión as colaboracións de Stephen McCarthy en multitude de cordas (sitar, steel), Marcus Tenney nos ventos (saxo e trompeta), e Johnny Hott coa percusión extra.

The Dream Syndicate foron un dos referentes daquel Paisley Underground californiano de metade dos 80s, que Wynn retomou máis de 25 anos despois coma se nada tivera pasado, con "How Did I Find Myself Here?" do 2017, "How We Found Ourselves ... Everywhere!" do 2018 no que adiantaban parte deste xiro á psicodelia, e "These Times" do 2019, todo con ANTI-.

THE DREAM SYNDICATE "The Universe Inside"

(ANTI-, 2020)

"The Unvierse Inside" xa é outra cousa, son cinco temas psicodélicos, poñendo ao seu servizo o rock, post-todo, e incluso arranxos de jazz, con sons e instrumentación de inspiración orientalista, recuperando as propostas máis ácidas de finais dos 60s.
En realidade, gravouse durante as sesións de "These Times", coma unha jam de 80 minutos, pero á que logo foron dando forma e unha identidade propia.
Abre coa descomunal 'The Regulator', que xa empregaron como presentación do álbum, unha peza de 20 minutos a modo de suite que dalgún modo xa desvela como seguirá o resto do álbum. En 'The Longing' retoman moitos dos elementos tradicionais da banda, pero para empregalos como contraste fronte ao ruidismo. 'Apropos of nothing' é segurament a peza máis psicodélica, acid rock con toques orientais e un increscendo que non acaba de estoupar, para conectar con 'Dusting off the Rust' un instrumental con ritmo máis frenético e maquinista. Para rematar, a fermosa 'The slowest rendition', síntese da psicodelia e o jazz cos Dream Syndicate dos 80s. 

A inspiración de Wynn segue a dar resultados fantásticos, nesta ocasión completando un xiro brutal iniciado coa recuperación da banda, e que veremos cara onde segue. Un discazo que vos sorprenderá, do mellor que levamos escoitado no que vai de ano con diferencia.

The Chats "High Risk Behaviour"

Máis recomendacións para o confinamento.

Hoxe achegámonos aos australianos The Chats.

"High Risk Behaviour" é o seu debut en lp , logo dun bo puñado de singles e eps nos últimos anos en diferentes formatos.

Son 14 temas que apenas chegan aos 28 minutos, que son todo un sopapo de aire fresco que tanta falta fai de cando en vez, e non te despistes por que se non podes perderte algún dos teus temas favoritos. Garage punk sen concecións á pausa, con influencia do hardcore californiano dos 80s: velocidade, diversión e todo actitude.

Quedámonos cos xiros de 'The Clap', 'Identity Theft' que a recuperan do single do ano pasado, 'Dine N Dash' ou 'Ross River' que son auténticos pepinazos, ou a enérxica 'Heatstroke'. Para o final nos deixan os temas máis elaborados, tanto por estrutura coma por duración: 'Do What I want' e 'Better than you'.

Todo un discazo de punk. Non o deixedes pasar.

>> High Risk Behaviour no bandcamp.

THE CHATS "High Risk Behaviour"

(Bargain Bin Records, 2020)

Tim Holehouse & Family Folks 'Good Morning Mr Vampire'

Máis novidades que chegan estes días.

Durante o fin de semana, os Family Folks subiron un novo tema, compartido co amigo Tim Holehouse. 'Good Morning Mr Vampire' foi gravado durante as sesións do álbum "The Anvil Sea" no 2018, e é unha especie de medley con fragmentos de varios temas de Holehouse, Hit the Road!!

Xa o tedes dispoñible no seu bandcamp.

O Record Store Day, o 20 de xuño

Esta semana deberiamos estar celebrando o Record Store Day, o día das tendas de discos, que como tantas outras cousas busca novas datas para a súa celebración. A data prevista será o 20 de xuño. Podedes ver o comunicado oficial na web do Record Store Day Spain aquí.

E xa que tedes máis tempo que outros anos, mellor que lle metades un bo repaso á lista de lanzamentos especiais para ese día.

Sun Ra: "Space is the Place" Expanded Edition

Xa vos temos recomendado moito material de Sun Ra neste blog, incluído este mesmo filme, pero estes días estivemos a revisalo, así que ahí vai de novo.

Sun Ra, filósofo, músico i extraterrestre. Un dos maiores xenios do planeta da música, e por suposto un dos máis excéntricos. Pioneiro na introducción de instrumentos electrónicos no jazz, todo se lle quedou pequeno, coa súa Sun Ra Arkestra superou os límites que ninguén se chegou a contemplar. Ataviado como herdeiro do deus Ra na terra levou o freejazz á súa dimensión espacial, i é que ata a súa morte, sempre dixo que viña de Saturno...

"Space is the place" foi o seu 12º álbum, seguramente o máis exitoso da súa extensa carreira. Publicado en 1973, cando contaba xa cunha recoñecida traxectoria, tanto coma músico de jazz e coma figura do espectáculo. En 1959 protagonizara xa o documental The Cry of Jazz, pero daquela era só un destacado jazzman, non un profeta de Saturno.

O filme xestouse na Universidade de Berkeley, na que Sun Ra coincidira co Jim Newman, que logo se convertiría en afamado productor televisivo e creador de arte audiovisual.

A gravación do álbum foi a escusa perfecta para dar renda solta á creatividade de Newman e Ra. O guión correu a cargo de Sun Ra e Joshua Smith, coa dirección de John Coney e baixo a produción de Newman. 

Space is the Place estreouse en novembro do 74, e o resultado foi un filme tan complexo coma delirante, a medio camiño entre o blaxploitation da época e un thriller galáctico, sobre o que podedes atopar moitas crónicas e reseñas. Pero como bo cine experimental será mellor que o vexades primeiro e vos deixedes levar polo free jazz espacial de Sun Ra & His Arkestra e as escenas imposibles que recrean, e logo volvades a ler sobre as súas repercusións sociais (nas loitas raciais pola igualdade de dereitos) e incluso as múltiples interpretacións sociolóxicas e ata economicas que se teñen feito sobre o filme. Unha peza de culto dende o principio.

Aínda que Space is the Place está inspirada no álbum do mesmo nome, preparouse unha banda sonora específica, pero non se publicou como tal oficialmente ata 1993, trala morte de Sun Ra, co selo de Evidence Music, cos temas tal e como foran arranxados para o filme. 

No 2015, pasado o 40 aniversario da súa estrea, lanzouse unha versión extendida do filme con moitos extras: Space is the Place Expanded Edition, coa cinta restaurada e incluíndo algunhas escenas eliminadas (sobre todo con prostitutas), ademáis dun libro de 125 páxinas con fotos da rodaxe e deseños, e entrevistas cos cineastas e músicos da Sun Ra Arkestra, ademais do cd coa banda sonora definitiva.

Aquí a tedes, unha xoia de visión obrigatoria:

Volve El Víbora!!

O certo é que non podemos queixarnos da cantidade de oferta cultural que nos chega para pasar esta tempada. O sector cultural, tanto profesionais coma afeccionados, estan a volcarse para facernos este confinamento o máis soportable posible, así que estamos todos máis que en débeda con todos eles, e haberá que compensarllo (pero ben) cando todo volva a poñerse en marcha. Mutiplícanse as interactuacións na rede, compartense contidos de balde... e ata referentes das nosas vidas retoman a súa actividade.

A semana pasada, dende Ediciones La Cúpula lanzaron un número especial de El Víbora, a que foi durante moitos anos a revista máis lonxeva do panorama español, e un referente do comic alternativo e para adultos.

Durante os seus 25 anos de vida o seu lema era Comix para Supervivientes, e este número extraordinario o convirte en máis acertado se cabe. 

O tedes dispoñible na web de Ediciones La Cúpula. 

Compartídeo, e de paso, repasade o seu arquivo!.

"Bug on Yonkers" tributo de Dwyer a Michael Yonkers

Mentres repasamos todos eses lanzamentos que estaban previstos para o Record Store Day, e polos que teremos que agardar, imos atopándo auténticas marabillas que están a poñernos os dentes longos.

Un deles é o novo dos Damaged Bug, a banda de John Dwyer paralela aos Oh Sees. "Bug On Yonkers" é o que Dwyer tiña preparado para este RDS, un álbum de homenaxe ao xenial Michael Yonkers.

Xa vostemos recomendado neste blog o "Microminiature Love" da Michael Yonkers Band, un auténtico pioneiro de novos sons nos efervescentes finais dos 60s. Eu non cheguei ata el ata que Sub Pop reeditou ese álbum no 2003, pero dende entón o teño coma un dos discos imprescindibles desa época.

"Bug On Yonkers" estará dispoñible online o próximo día 18 e en vinilo, se é posible, para o RSD do 20 de xuño.

En calqueira caso, unha ocasión perfecta para recuperar os discos de Yonkers.

Bowie "Changes Now Bowie"

A semana pasada anunciouse novo lanzamento de David Bowie, aínda que non se trata de novo material, se non de grabacións inéditas.

Este "Changes Now Bowie" (Parlophone) inclúe 9 temas rexistrado en novembro de 1996, nos estudios Looking Glass de NYC, durante os ensaios do concerto co que conmemoraría o seu 50 cumpreanos, no Madison Square Garden en xaneiro do 97. 

Os temas son 'The Man Who Sold The World', 'Aladdin Sane', a versión da Velvet 'White Light / White Heat', 'Shopping For Girls', 'Lady Stardust', 'The Supermen', 'Repetition', 'Andy Warhol' e 'Quicksand'.

Precisamente hoxe lanzouse o clip co tema 'Repetition', como adianto do álbum que tiña previsto lanzarse o próximo sábado (17 de abril) pola celebración do Record Store Day. Como sabedes, debido á crise sanitaria, a celebración do RSD adiouse ata o 20 de xuño, polo que a maioría das edicións especiais previstas terán que agardar, e sempre no caso de poder celebrarse nesa data.

Así que a edición deste "Changes Now Bowie" terá que esperar, pero manteñen a data do 17 de abril para o seu lanzamento nas plataformas dixitais.

Polo momento aquí tedes 'Repetition', realizado por Tim Pope durante os ensaios da xira do 'Earthling' de 1997 e inédito ata o de agora.

Davila 666 'Huesos Viejos'

Boas novas para os seguidores dos Davila 666.

Estes días lanzaron o clip do tema 'Huesos Viejos' que, se non fallan as nosas contas, é o primeiro material novo que lanzan dende o 2012. 

Tras varias reunións durante os últimos anos, e os anuncios nas redes de traballo no estudio, aquí temos o primeiro que nos amosan do seu novo álbum. Impacientes estamos xa...

Moura "Moura"

Imos con algo do país, que vai tocando.

Un dos álbumes que máis levábamos agardando é o debut de Moura, quinteto psicodélico da Coruña, que acaban de lanzar co selo gaditano Spinda Records.

Neste debut presentannos catro temas, nos que combinan á perfección o rock psicodélico e progresivo con altas doses de folk, con coros e instrumentos tradicionais, que o converten nun fantástico aquelarre do país para estes tempos. Para esa parte tradicinal contaron coa Irmandade Ártabra, entre os que están Belém Tajes nas voces ou Pablo Reboiras á zanfona.

"Moura" son catro pezas que vos hipnotizarán coma poucos, con capas e capas de sons complexos e composicións máis que sorprendentes. Tres delas son propias: 'Eira', 'Da Interzona A Annexia' e 'O Curioso Caso De Mademoiselle X', mentres que en 'Ronda das Mafarricas' arranxan música de Zeca Afonso con letras de Antonio Quadros. 

Nesta situación de confinamento xa nos perdimos a estrea da súa xira no Esmorga Fest de Sarria, e tamén nos quedamos sen o show que ían a ofrecernos na Krazzy Kray de Cambados, así que só nos queda agardar a que cheguen a casa os lps, e un pouco máis para poder desfrutalos en directo.

Recomendadísimos!!

>>> Xa podedes facervos coas diferentes edicións dispoñibles de "Moura" no bandcamp de Spinda Records.

MOURA "Moura"

(Spinda Records, 2020)

Bill Withers

Bill Withers

(1938 - 2020)

Adam Schlesinger

Adam Schlesinger

(1967 - 2020)

Fountains of Wayne / Tinted Windows / Ivy / Scratchie Records

Nine Inch Nails "Ghosts V: Together / Ghosts VI: Locusts"

Novas dos Nine Inch Nails deste mesmo fin de semana. 

Veñen de anunciar o lanzamento de dous novos álbumes dispoñibles xa en tódalas plataformas, e con descarga directa e de balde dende a súa web.

NINE INCH NAILS "Ghosts V: Together / Ghosts VI: Locusts"

(The Null Corp., 2020)

Trátase de "Ghosts V: Together" e "Ghosts VI: Locusts", que son a continuación daquel enorme "Ghosts I-IV" do 2008. Os catro volumes foran presentados coma unha banda sonora para soñar despertos, con 36 cortes sen título, e que fora a primeira incorporación de Atticus Ross máis aló das labores de produción.

Agora, unha vez integrado na banda da Trent Reznor, e logo de varias colaboracións en bandas sonoras para filmes, retoman a serie Ghosts con estes dous volumes.

Podedes facervos con eles directamente na web de NIN.